Mikel Torres: “Ekonomikoki sendoa, sozialki arduratsua eta ingurumenaren aldetik jasangarria izan behar du XXI. mendeko enpresak”

• Lehendakariordeak eta Ekonomia, Lan eta Enplegu sailburuak nabarmendu du lehiakortasuna “berritzen, esportatzen eta erresistitzen” duten erakundeekin eraikitzen dela, eta lankidetza publiko-pribatuaren alde egin du, Euskadi “produktiboagoa, digitalagoa eta inklusiboagoa” lortzeko

Mikel Torres Lehendakariordeak eta Ekonomia, Lan eta Enplegu sailburuak asteazken honetan defendatu duenez, “Ekonomikoki sendoa, sozialki arduratsua eta ingurumenaren aldetik jasangarria izan behar du XXI. mendeko enpresak”, eta lehiakortasuna ulertu behar dela ongizateari eta gizarte kohesioari eusteko "bitarteko" gisa. “Euskadik enpresa lehiakorrak behar ditu, baina, batez ere, haren jendearekin eta lurrarekin konprometitutako enpresak behar ditu”, azpimarratu du.

Konfekoopek eta Kooperatiben Kontseiluak Bilbon antolatutako ‘Kooperatiben zeregin estrategikoa Euskadiko lehiakortasunean eta industrian’ jardunaldiaren hasieran, Torresek nabarmendu du lehiakortasuna ezin dela ulertu “kostuen edo produktibitatearen terminoetan soilik”, baizik eta “berritzen, esportatzen eta erresistitzen duten enpresetan”. Zentzu horretan, dio hazkunde jasangarriak “balio ekonomikoa eta, aldi berean, balio soziala” sortzen duten enpresak eskatzen dituela, “errentagarritasuna inklusioarekin, eraginkortasuna ekitatearekin eta estrategia helburuarekin integratzen duten enpresak".

Lehendakariordeak adierazi duenez, Euskadi “eraldaketa sakoneko” une batean dago
—trantsizio energetikoa, iraultza digitala, balio kate globalen aldaketak edo erronka demografikoa—, eta horiek eskatzen dute enpresa-indarra eta gizarte kohesioa “indartzea”, lehiakortasun iraunkorreko eredu baten zutabe gisa. Horretarako, Mikel Torresen ustez, politika ekonomiko eta industriala lankidetza publiko-pribatuan eta ekosistemaren indartzean “oinarritu behar da”, horrela “Euskadi produktiboagoa, digitalagoa, jasangarriagoa eta inklusiboagoa” lortzeko.

Eta balioan jarri du kooperatibismoaren zeregin estrategikoa. Gogoratu duenez, eredu hori euskal ehun ekonomikoaren “egiturazko zutabeetako bat” da, eta funtsezko ezaugarriak eskaintzen ditu ingurune global “aldakor, zalantzagarri, konplexu eta anbiguo batean”. Testuinguru horretan, “parte-hartzea, erantzunkidetasuna, epe luzerako ikuspegia, enpresa-proiektuan eta ingurunean berrinbertsioa, eta sortutako aberastasunaren banaketa orekatuagoa” eskatu ditu.

Erronkak

Lehendakariordeak eskatu du “autokonplazentzian ez erortzeko, erronkak izugarriak direlako”. “I+Gn inbertitzen jarraitu behar dugu, digitalizazioa bizkortu, adimen artifiziala eta teknologia berriak gure ekoizpen prozesuetan integratu, trantsizio energetikoari anbizioz eta errealismoz aurre egin, eta talentu gaztea erakarri eta atxiki”, baieztatu du.

Torresek nabarmendu du, halaber, Euskadik historian zehar erakutsi duen “egokitzeko gaitasun aparta”, eta adierazi du une garrantzitsu baten aurrean dagoela berriz ere, “jauzi kualitatibo berri baten aurrean”. “Lankidetzan, elkarrekiko konfiantzan eta konpromiso partekatuan oinarrituta egiten badugu, erronkaren mailan egongo gara”, gaineratu du.