Nerea Melgosa "Sare sozialetan adingabeek duten sarbideari, titularretik harago, eztabaida lasai batetik heldu behar zaio"

Gaur, Herri Irratian egindako elkarrizketa batean, Ongizate, Gazteria eta Erronka Demografikoko sailburuak 16 urtetik beherakoei sare sozialen erabilera debekatzeko Pedro Sanchezen iragarpena baloratu egin du. "Ez da debekatzeko edo ez debekatzeko egoera bat, koiunturalagoa da eta titularretik haratago joan behar da. Herritarrek nerabeen sare sozialen erabileraren inguruko ertz guztiak barne hartzen dituen diskurtsoa merezi dute" azaldu du Nerea Melgosak. Melgosak gogorarazi du Lehendakariak iraileko politika orokorreko osoko bilkuran gizartearen ongizate emozional faltari heltzeko beharrari buruz hitz egin zuela, eta gaineratu du Eusko Jaurlaritza aspalditik ari dela lanean egoera horri aurre egiteko hainbat baliabide, prestazio eta estrategiatan. Sailburuak azpimarratu duenez, Ongizate, Gazteria eta Erronka Demografikoko Sailak gida bat eskaini die Euskadiko familiei pantailen erabilera arduratsua egiteko. Gida hauek adingabearen garapen-etaparen arabera antolatuta daude: 0-3 urte; 4-6 urte; 7-9 urte; 10-12 urte; 13-15 urte; eta 16-18 urte. Horietako bakoitzean labur eta modu generikoan azaltzen da adin tarte horretako adingabeak nolakoak diren, Internetekin nola erlazionatzen diren, zein arrisku sor daitezkeen eta erreferentziako helduek zer egin dezaketen laguntzeko.

Datorren astean Familien Euskal Kontseilua bilduko da, eta bertan beste urrats bat emango da Familien eta Haurren V. Planaren bidez. Esparru horretan sareei buruzko proposamenei buruz hitz egingo da. "Prebentziotik lan egin behar dugu, eta hazkuntza positiboa nola garatu daiteken jakinda. Gizarte zibilarekin elkartu eta erabakiak hartu behar ditugu "gaineratu du Melgosak.

Egoera irregularrean dauden etorkinen ezohiko erregularizazioari buruz, Melgosak bere iritzia eman du elkarrizketan. "Niri erregularizazioaren forma ez zitzaidan gustatu. Gogoratu nahi dut ILP batek ibilbide bat eginda zuela eta orain Errege Dekretu bat agertu dela. Hobetu zitekeen, baina Dekretua dago eta aprobetxatu egin behar da. Erregularizazioa balia dezaketen pertsonentzako informazio-gidak egin dituen lehen gobernua gara ", azaldu du sailburuak. Nerea Melgosaren hitzetan, hainbat kolektibori aukerak emateko eta duintasuna emateko aukera bat da, kalean lo egiten duten gazteak eta egunez prestakuntza-zentro batera joaten direnak nabarmenduz, baita zainketen arloan lan egiten duten emakumeak ere. "Guztiengana iritsi nahi dugu, pertsona horiek guztiak behar ditugu belaunaldien arteko erreleboa egiteko eta gizarte eta lan-formazioaren bidez haien integrazioa errazteko. Erregularizazioa ondo dago, baina immigrazioko egiturazko plan bat behar dugu. Adabaki txikiak jarri beharrean Atzerritartasun Legea aldatu behar da" azaldu du Ongizate, Gazteria eta Erronka Demografikoko sailburuak.