Euskadik bere lidergoa sendotu du ardoaren sektorean Barcelona Wine Week azokan, 48 enpresa ekoizleren parte-hartze errekorrarekin

• Eusko Jaurlaritzak ardoaren, sagardoaren eta euskal destilatuen nazioarteko proiekzioa bultzatzen du, estatuko kalitatezko ardoaren erakusleiho nagusian
• Amaia Barredo, Elikadura, Landa Garapena, Nekazaritza eta Arrantzako sailburua: “Barcelona Wine Week aukera estrategikoa da munduari euskal ekoizpenen bikaintasuna, aniztasuna eta nortasun propioa erakusteko”

Bartzelonak Barcelona Wine Week (BWW) azokaren seigarren edizioa hartuko du gaurtik asteazkenera arte; estatuko kalitatezko ardoaren azoka nagusia da, eta ardoaren sektorearen nazioartekotzerako funtsezko plataformetako bat. Montjuïceko Fira de Barcelonako esparruan egiten den azoka honek parte-hartze errekorra izango du: 1.300 upategi baino gehiago eta 26.000 bisitari profesional baino gehiago espero dira, horietatik %20 nazioarteko merkatuetatik etorriak.

Testuinguru horretan, Euskadik nabarmen indartu du bere presentzia azokan, Eusko Jaurlaritzaren babespean parte hartzen duten 48 euskal enpresa ekoizlerekin. Kopuru horrek %71,4ko hazkundea dakar 2023arekin alderatuta —urte hartan parte hartu zuen Euskadik lehen aldiz Barcelona Wine Week azokan—, eta euskal ordezkaritzaren marka berria ezartzen du ekitaldian. Horiei beste 15 inguru euskal enpresa gehitu beharko litzaizkieke, euren kabuz azokara joan direnak.

Parte hartzen duten enpresak Arabako Errioxatik, Euskadiko Txakolinetik eta Euskal Sagardoatik datoz, eta aurten lehen aldiz Arabako bi destilategi ere gehitu dira, azokan ordezkatutako euskal produktuen aniztasuna handituz. Enpresa guztiak 1. pabiloian kokatuta daude, Jatorri Deiturei eta kalitate-zigiluei eskainitako BWW Lands eremuan; destilategiak, berriz, proiektu txiki eta sortzaileei zuzendutako BWW Impulse gunean integratu dira.

Eusko Jaurlaritzako Elikadura, Landa Garapena, Nekazaritza eta Arrantzako sailburu Amaia Barredok azpimarratu duenez, “Barcelona Wine Week azokan euskal partaidetzaren hazkunde iraunkorrak sektorearen dinamismoa eta gure upategi eta ekoizleek merkatu berriak irekitzeko eta nazioarteko posizionamendua sendotzeko duten interesa islatzen du”.

Euskadiren guneko elementu nabarmenenetako bat berriro ere Basque Wine Bar da: Basque Wine marka sustatzailearen babesean dauden ardoen erakusketa eta dastatze-gune espezifikoa. Iaz publiko profesionalaren harrera handia izan zuen espazio honek arreta pertsonalizatua eskaintzen du, ardo bakoitza banaka baloratuz, eta erosleen eta upategien arteko harreman zuzena errazten du.

Mikel Garaizabal enologoa arduratzen da dastaketak gidatzeaz eta bisitariei aholkularitza emateaz; ondoren, upategi ekoizleak zuzenean ezagutzera gonbidatzen ditu haien standetan. Basque Wine Bar 1. pabiloian dago, B181 standean, gainerako euskal enpresekin batera.

Barcelona Wine Week 2026k bigarren urtez jarraian bi pabiloi hartzen ditu, %9ko hazkundea izan du eta 10.800 m²-ra iritsi da. Gainera, 80 jarduerako programa zabala eta 136 aditu nazional eta nazioartekoren parte-hartzea ditu, sektorearen ezagutza, berrikuntza eta joeretarako topagune nagusi gisa sendotuz.

“Babes instituzionala funtsezkoa da gure enpresek nazioarteko merkatuetan baldintza berdinetan lehiatu ahal izateko”, gaineratu du Barredok. “Eusko Jaurlaritzatik lehen sektorea eta elikadura-industria laguntzen jarraitzen dugu, sustapen, bereizketa eta balioa sortzeko estrategian”.

UPATEGIEN ZERRENDA

Arabako Errioxako upategiak:

Altos de Rioja

Altún

Área Pequeña Viticultores

Bodega 202

Bodega Bello Berganzo

Bodegas de la Marquesa-Valserrano

Bodegas Familia Chavarri

Bodegas Fos

Bodegas Heredad de Aduna

Bodegas Loli Casado

Bodegas Monastasia Rioja

Bodegas Ruiz de Viñaspre

Bodegas Tierra

Bodegas Valdelana

Bodegas Ysios

Carmen F. Uriarte - Viticultura y Vino

Córdoba Martínez

Domaine Canadell Sanchez

Dominio del Challao

Eguren Ugarte

Garcia de Olano

Hermanos Frías del Val

Luberri Monje Amestoy

Ostatu

Oxer Wines

Pujanza Bodegas y Viñedos

Señorío de Arana

Ukan

Valdemar Family

Arabako Txakolina:

Artomaña Txakolina

Astobiza

Cámara de Comercio de Bilbao

Getariako Txakolina:

Bodega Aitaren Upategia

Bodega K5

Gaintza Txakolina

Hika Bodega

Hiruzta Txakolina

Mokoroa Txakolina

Talai Berri Txakolina

Txakoli Ameztoi

Txakoli Rezabal

Txomin Etxaniz

Bizkaiako Txakolina:

LVRE Wines

Talleri Berria Upategia eta Mahastiak

Txakoli Virgen de Lorea (Otxaran)

Euskal Sagardoak:

Sidras Bereziartua Sagardoak

Zapiain

Destilatuak:

Basque Moonshiners

Licores y Vermouth Barañano