Eusko Jaurlaritzak martxoan entregatuko ditu Barakaldoko Bizkaiko Labe Garaiak kaleko 3. zenbakian sustatutako alokairuko 108 BOE

• Visesak bultzatu du sustapena, eta Alokabidek kudeatuko du. Obraren aurrekontua 10,79 milioi eurokoa da, eta inbertsioa, guztira, 15,38 milioikoa; horietatik 4,47 milioi (% 29) Next Generation EB funtsetakoak dira

• Etxebizitzek logela bat, bi eta hiru dituzte, 42,63 eta 87,18 m² bitarteko azalera erabilgarria. Bizikidetza-unitatearen diru-sarreren eta osaeraren arabera, hilean 206 eta 640 euro bitarteko gutxi gorabeherako errentak izango dituzte. Horiei gastu komunak eta hornidurak gehituko zaizkie

Denis Itxaso Eusko Jaurlaritzako Etxebizitza eta Hiri Agendako sailburuak eta Amaia del Campo Barakaldoko alkateak Juan Antonio Pizarro Hirigintza zinegotziarekin batera Bizkaiko Labe Garaiak kaleko 3. zenbakiko alokairuko babes ofizialeko 108 etxebizitzaren sustapena bisitatu dute gaur goizean, El Carmen II sektoreko RES AL-23 bizitegi-eremuan. Amaitu dira dagoeneko obrak, eta martxoan entregatuko zaizkie maizterrei. Etxebizitza hauek Eusko Jaurlaritzak legegintzaldi honetan sustatzeko konpromisoa hartu duen 7.000 etxebizitzetako bat dira.

Visesaren (Eusko Jaurlaritzaren mendeko sozietate publikoaren) sustapena da, eta Alokabidek (alokairuko etxebizitzen parke publikoaren kudeaketaz arduratzen den sozietate publikoak) kudeatuko du. Horren bidez, 108 etxebizitza horiek Etxebideren esleipen-sistemara gehituko dira, eta, hala, Barakaldon, eskaera handia duen udalerria izanik, etxebizitza eskuragarrien eskaintza indartu egingo da.

Bisitan, Denis Itxaso sailburuak sustapenaren garrantzia nabarmendu du, bai etxebizitza kopuruagatik, bai alokairuko parke publikoari egiten dion zuzeneko ekarpenagatik. «Babes ofizialeko 108 etxebizitza horiek urrats garrantzitsua dira etxebizitza prezio eskuragarrian eskuratzeko aukeraren zain dauden pertsona eta familia askorentzat. Ez gara etorkizuneko proiektuez ari, laster benetako etxe bihurtuko diren behin betiko etxebizitzez baizik», adierazi du. Ildo horretan, Itxasok azpimarratu du Etxebizitza eta Hiri Agenda Saila etxebizitza publikoa eraikitzeko erritmoa bizkortzeko egiten ari den etengabeko ahaleginaren parte direla halako jarduketak. «Etxebizitza, lurzoru eta hirigintza arloko Premiazko Neurrien Legea onartu ondoren, epeak laburtzeko, lurzorua aktibatzeko eta sustapen publikoari bizkortasun handiagoa emateko tresnak indartzen ari gara. Helburua argi dugu: etxebizitza gehiago, azkarrago eta gehien behar den lekuan, Ezkerraldean eta, bereziki, Barakaldon gertatzen den bezala”, gaineratu du.

Amaia del Campo alkateak, bere aldetik, sustapen hau posible egiteko erakundeen arteko lankidetza nabarmendu du, eta hirian alokairuko parke publikoa handitzen jarraitzearen garrantzia azpimarratu du. «Barakaldok alokairuko etxebizitza babestua behar du, eta gaur ikus dezakegunez, konpromiso hori egia bihurtzen da, laster herritarrentzat izango den sustapen hau entregatuta. Udalaren eta Eusko Jaurlaritzaren arteko lankidetzari esker egikaritu da jarduketa, eta frogatzen du erakundeen arteko elkarlana funtsezkoa dela herritarren kezka nagusietako bati erantzuteko», adierazi du.

Sustapenaren ezaugarriak eta errentak

Eraikinaren lursaila El Carmen II sektorearen barruan dago, hiri-ingurune finkatuan. Ingurune hori Bizkaiko Labe Garaien etorbideak mugatzen du, eta beste egoitza-partzela batzuekin eta espazio libre publikoekin mugakide da. Eraikitako espazioak 2.282 metro karratu inguruko azalera du, “L” forma du, orientazioa ipar-ekialdera, eta oso desnibel txikia. Ibaizabal ibaitik hurbil dagoenez eta maila freatikoa duenez eraikinaren zimenduak jartzerakoan hartutako soluzio teknikoak baldintzatu egin dira.

Proiektua Cooperactiva Arquitectos enpresak idatzi du eta lanak Eraikuntza Birgaikuntza Artapena, SL (E.B.A.) enpresari egokitu zaizkio. Eraikinak sotoko bi solairu, beheko solairua, sestra gaineko sei solairu eta instalazioetarako den teilatupe bat ditu. Teilatuaren planoek ez dute baimendutako gehienezko makurdura gainditzen. Etxebizitza guztiak atari bakarra dute. Beheko solairuan hiru sarbide eta komunikazio bertikaleko hiru nukleo daude, eta bakoitzak dagozkion eskailerak eta igogailua ditu. Solairu bakoitzean bost eta sei etxebizitzari emango diote zerbitzua. Erdiko korridore batek blokea luzetara zeharkatzen du, eta etxebizitza guztiak lotu. Beheko solairuan, eraikinaren alde motzari erantzuna emateko, eraikinaren eta espazio publikoaren arteko lotura hobetzeko atari handi irekia dago.

108 etxebizitzek hainbat motatakoak dira: gela bateko 13 etxebizitza, bi gelako 81 etxebizitza —horietako bost mugikortasun urriko pertsonentzat egokituta daude— eta hiru gelako 14 etxebizitza. Jatorrizko proiektua egungo bizigarritasun-dekretua baino lehenagokoa bada ere, izapideak egin bitartean egokitu egin zen, etxebizitza guztiek terraza izan zezaten, (gutxienez metro eta erdiko sakonera eta gutxienez lau metro koadroko azalera erabilgarria). Hala, hobetu egin ziren kanpoko espazioen bizigarritasun- eta kalitate-baldintzak.

Azalera eta errentei dagokienez, gela bateko etxebizitzek 42,63 eta 43,63 metro karratu bitarteko azalera erabilgarriak dituzte; bi gelakoek, berriz, 56,00 eta 66,09 metro karratu bitarteko azalera erabilgarria; eta hiru gelakoek 81,02 eta 87,18 metro karratu bitarteko azalera erabilgarria. Bizikidetza-unitate adjudikaziodunen tamainaren eta diru-sarreren arabera, hileko errentak, gutxi gorabehera, 206 eta 463 euro bitartekoak izan daitezke gela bateko etxebizitzen kasuan, 260 eta 529 euro bitartekoak bi gelakoen kasuan, eta 367 eta 640 euro bitartekoak hiru gelakoen kasuan. Prezio horri gehitu beharko zaizkio eraikinaren gastu komunak eta hornidurei dagozkien kontsumoak.

Eraikuntzari dagokionez, mikropiloteen bidez zimendatu da, Bizkaiko Labe Garaien etorbiderako frontean arrokaraino iritsi arte. Gainerako perimetroan, berriz, alde bateko eta biko euste-hormak egin dira, lurraren baldintzen eta ondoko lursailekiko loturaren arabera. Eraikinaren egitura forjatu erdiprefabrikatuak dituzten hormigoi armatuzko zutabe eta habeen portikoetan oinarritzen da, eta fatxada aireztatu gisa altxatu da, aluminiozko xaflazko kanpoaldea eta adreiluzko fabrikazko barnealdea du, eraikinaren portaera termikoa eta iraunkortasuna hobetzeko.

Sistema % 100 elektrikoa

Instalazioei eta jasangarritasunari dagokienez, Visesak azken jarduketetan erabilitako ereduari jarraitu dio sustapenak: sistema % 100 elektrikoa da, eta energia-eskaera murrizteko estrategiak ditu, hala nola isolamendu termikoa indartzea, estankotasuna hobetzea eta beroa berreskuratzen duten fluxu bikoitzeko aireztapen mekanikoko sistemak ezartzea. Ur bero sanitarioa termo elektrikoen bidez eta berogailu elektrikoen bidez ekoiztuko da. Berogailu horiek instalazio sinple, sendo eta mantentze-lan errazekoa bermatzen dute.

Instalazio horiek osatzeko, efizientzia handiko aireztapen-sistema kolektiboa dago estalkian, baita eremu fotovoltaikoa ere. Horren bidez, indarreko araudiak eskatzen duen energia berriztagarriaren gutxieneko ekarpena bete daiteke. Sistema horren bidez, gainera, fluido termo-erolearen zirkuituak ken daitezke, eta, hala, eraikuntza sinplifikatu eta mantentze-kostuak murriztu egiten dira, eta eraikinak bizi-ziklo osoan duen portaera hobetu egiten da. Nabarmentzekoa da, halaber, BIM metodologia ezartzeko esperientzia pilotu gisa balio izan duela proiektu honek, Eusko Jaurlaritzaren eraikuntzaren digitalizazio-estrategiaren barruan.

Eraikuntzari eta lotutako urbanizazioari dagokien obraren aurrekontua (PEC kontrataren aurrekontua) 10.794.251,05 eurokoa da, BEZik gabe. Bestalde, sustapenaren inbertsio osoa 15.386.962,67 eurokoa da, eta, zenbateko horrek barne hartzen ditu, eraikuntzaz eta urbanizazioaz gain, ordainsari teknikoen, ekipamenduaren, lizentzien eta lurzoruaren balioen kostuak. Jarduketak, gainera, Next Generation EU funtsetatik jasotako finantziazioa du, Etxebizitza eta Hiri Agendako Ministerioarekin sinatutako hitzarmenaren bidez. Hala, 4,47 milioi euroko laguntza aurreikusi da; hau da, sustapenaren guztizko kostu eguneratuaren % 29 inguru.

Lurzoruari dagokionez, Bilbao Ría 2000k doan laga zion lurzorua Eusko Jaurlaritzari, Urban-Galindo eremuan etxebizitza babestua garatzeko 1999an sinatutako lankidetza-hitzarmenaren bidez. Ondoren, 2018an, azalera-eskubidea Visesaren alde eratu zen, hura izan baita jarduketaren erakunde sustatzailea. Jatorrizko hitzarmenak etxebizitza babestua eraikitzeko udal-zergen salbuespena aurreikusten zuen arren, kasu honetan Visesa izan da Eraikuntza, Instalazio eta Obren gaineko Zerga (EIOZ) Barakaldoko Udalari ordaindu diona, sozietate publikoa hitzarmenaren sinatzailea ez zela eta, beraz, salbuespen horri heldu ezin ziola iritzita.

Visesaren beste jarduketa batzuk Barakaldon

Sustapen hau Visesak Barakaldoko sektore horretan egiten duen hirugarren eta azken jarduketa da, eta jarraipena ematen die, bai ikuspuntu estetikotik, bai bolumetrikotik, inguruan egindako aurreko bi sustapenei. Lehenengoa 2015ean amaitu zen, eta Bizkaiko Labe Garaiak etorbideko 7, 9, 11 eta 13 zenbakietan dauden 92 babes ofizialeko etxebizitzei dagokie. Bigarrena, 2021ean amaituta, babes ofizialeko 72 etxebizitzek osatzen dute, eta horiek salgai daude, etorbide bereko 5A, 5B eta 5C zenbakietan. Alokairuko hirugarren sustapen honen bidez, Eusko Jaurlaritzak etxebizitza babestuaren gune garrantzitsua finkatu du El Carmen eremuan, hainbat edukitza-erregimen uztartuta.

108 etxebizitza horiek Barakaldon alokairuko etxebizitza babestuen eskari handia dagoen unean egin dira. Etxebideren datuen arabera, gaur egun 8.909 bizikidetza-unitate daude udalerriko etxebizitza-eskarian inskribatuta, eta horietatik 7.037k (% 79) alokairuko etxebizitza eskatzen dute. Horietatik, zati handi bat 36 urtetik beherako pertsonei eta pertsona bakar batek osatutako bizikidetza-unitateei dagokie. Erregimen orokorreko babes ofizialeko etxebizitzaren kasuan, zehazki, alokairuko 4.702 bizikidetza-unitatek betetzen dituzte diru-sarreren baldintzak etxebizitza-mota hori eskuratzeko, eta horrek frogatzen du garrantzitsua dela parke publikoan sustapen berriak egiten jarraitzea.

Obrak amaitu eta lehen erabilerarako lizentzia eta behin betiko kalifikazioa lortu ondoren, datozen asteetan Alokabiderekin etxebizitzen eskriturak formalizatzea eta esleipen-prozesuari eta esleipendunei entregatzeari ekitea aurreikusten da. «Entregatutako sustapen bakoitza urrats bat gehiago da alokairuko parke publiko sendo eta egonkorra lortzeko, hala merkatuaren tentsioari aurre egiteko benetako alternatibak eskaintzeko gai izango gara. 108 etxebizitza hauek argi erakusten dute aurrerapausoak ematen ari garela, eta sustapen gehiagoren bidez, inbertsio gehiagoren bidez eta udalekin lankidetza handiagoaren bidez egiten jarraituko dugu hori», adierazi du Itxaso sailburuak.