Euskadiko zazpi helmugak jaso dute THA bereizgarria FITUR 2026an, Euskadik turismo adimendunean duen lidergoa finkatuz
FITUR 2026 azokaren esparruan, ostegun honetan, urtarrilak 22, Euskadiko zazpi helmugak Turismo Helmuga Adimendunaren (THA) bereizgarria jaso dute. Ekitaldian Jakes Agirrezabal Eusko Jaurlaritzako Turismo eta Merkataritzako sailburuordea izan da; aitortutako helmugei lagun egin die sailburuordeak, eta Euskadik turismo-eredu berritzaile eta jasangarri baten aldeko konpromisoa duela berretsi du.
Euskadik presentzia nabarmena izan du zazpi helmuga sarituekin, eta erreferente gisa duen posizioa indartu du turismo adimendunaren arloan:
- Aiaraldea
- Gorbeia Araba
- Gorbeia Bizkaia
- Urola Erdia
- Urola Garaia
- Goierri
- Vitoria-Gasteiz
Aitortza honek THA metodologiaren pean ebaluatutako helmugak bereizten ditu. Metodologia horrek 200 eskakizun baino gehiago aztertzen ditu bost ardatz estrategikoren inguruan: gobernantza, berrikuntza, teknologia, jasangarritasuna eta irisgarritasuna.
Akreditazio berri horien bidez, Euskadik sendo egiten du aurrera digitalizazioaren, jasangarritasunaren eta etengabeko hobekuntzaren estrategian; hala, Turismo Helmuga Adimendunen Sarean duen presentzia zabaldu eta lurraldearen berrikuntzan, kalitatean eta lehiakortasunean oinarritutako turismo-eredua sendotzen du.
Nabarmentzekoa da Bilbo, Donostia eta Gasteiz eskubide osoko Turismo Helmuga Adimendunak (THA) direla, SEGITTUR metodologiaren eskakizunen % 80 gainditzeagatik.
