Gobernu Kontseiluak onartu du 4,8 milioi euro bideratzea hirugarren sektorera, esku-hartze sozialaren eremuan
Gobernu Kontseiluak Euskal Autonomia Erkidegoko esku-hartze sozialaren eremuan hirugarren sektore sozialeko jarduerak sustatzeko 2026rako dirulaguntzak onartu ditu. Aurreikusitako diru-hornidura 4.792.480 eurokoa da.
Deialdi hau hirugarren sektorea eta gizarte- eta komunitate-garapena bultzatzean kokatzen da, eta entitateek gizarte-kohesioan eragin zuzena duten proiektuei eusteko duten gaitasuna indartzen du.
Ia 4 milioi euro oinarrizko laguntza materialerako
Era berean, oinarrizko laguntza materialerako laguntzei argi berdea eman zaie. Programa adingabeak beren kargura dituzten eta kalteberatasun handieneko egoeran dauden familiei laguntzera bideratuta dago, txartelen edo elikadura eta higiene pertsonaleko produktuekin truka daitezkeen baleen bidez egituratutako baliabide ekonomikoen bidez.
Programak ia 4 milioi euroko gehieneko zuzkidura du, laguntza materiala eta laguntza-neurriak eta laguntza teknikoa finantzatzeko, EGF+ 2022-2027 planaren esparruan.
Maria Ubarretxena bozeramaileak azaldu duen bezala, “deialdiak aurreikusten du laguntzak 2026ko abenduaren 31ra arte aitortzea eskatzaileari, hiru hilean behin modulatu daitekeen zenbateko batekin, familia-unitatearen benetako egoeraren arabera”.
Esparru honetan, halaber, Gobernu Kontseiluak Euskadiko Administrazio Orokorraren eta Barakaldoko Udalaren arteko lankidetza-hitzarmena onartu du, gazte-sistematik gazteen emantzipazioa erraztea helburu duen proiektu integral pilotu bati jarraipena emateko, gazteen parte-hartzearekin, trantsizio sozial eta demografikoko testuinguru batean. Akordioak EAEko gazteriaren arloko eskumen esklusiboa du oinarri, eta 2023ko abenduaren 29an sinatutako hitzarmenaren jarraipen gisa planteatzen da, hasitako lan-ildoari eusten dion aldaketa- eta luzapen-eranskin baten bidez. Hitzarmenari lotutako zuzkidura ekonomikoa 890.000 eurokoa da.
Azkenik, arlo honetan, Gobernu Kontseiluak Ongizate, Gazteria eta Erronka Demografikoaren Sailaren eta Espainiako Gurutze Gorriaren arteko lankidetza-hitzarmena luzatzeko gehigarriaren berri eman du. Hitzarmen horrek 2026an erakunde laguntzaile gisa jarraituko du Europako Plus Gizarte Funtsak (EGF+) kofinantzatutako oinarrizko laguntza materialaren programa kudeatzen. 2026an, programa finantzatzeko gehieneko zenbatekoa ia 4 milioi eurokoa da, eta oinarrizko laguntza materialean, laguntza-neurrietan eta laguntza teknikoan sartutako produktuen gastuen artean banatzen da, EGF+ 2021-2027 programazioarekin bat etorriz.
Jarduera sindikalerako laguntzak
Gobernu Kontseiluak Euskal Autonomia Erkidegoko Administrazioan ordezkaritza duten sindikatuen jarduera errazten duten laguntzak onartu ditu gaur. Guztira: 432.000 euro.
Mahai Orokorrean ordezkaritza duten 13 sindikatuek partida horren bidez finantzatu ahal izango dituzte beren gastuak eta jarduerak, bai Administrazioan, bai Mahai Orokorrean.
577.000 euro baino gehiago lan-arriskuen prebentziorako
Kontseiluak argi berdea eman dio EAEn 2026an laneko arriskuen prebentzioaren arloan jarduerak egiteko 577.000 eurotik gorako dirulaguntzen beste deialdi bati, Osalan-Laneko Segurtasun eta Osasunerako Euskal Erakundea buru dela. Laguntza horiek langileei eta enpresei zuzenduta daude; bereziki, enpresa txikiei, hau da, 50 langile baino gutxiago dituztenei.
“Deialdi honen helburu nagusia da lan-ingurunean segurtasuna eta osasuna hobetzen lagunduko duten sektorearteko eta sektoreko ekintzak sustatzea” azaldu du Ubarretxenak.
Prestakuntza-planak sindikatu- eta enpresa-erakundeetan
Era berean, Gobernu Kontseiluak onartu du erakunde sindikal eta enpresarialei beren jarduera-eremuetako berezko gaiei dagokienez erakunde horiekin lotutako pertsonen kualifikazioa hobetzeko prestakuntza-planak garatzeko dirulaguntzak ematea arautzen duen dekretuaren aldaketa.
Araua Dirulaguntzen Araubidea Erregulatzeko Legean xedatutakora egokitzeko beharrari erantzuten dio aldaketak, eta, horrela, prestakuntza-planen jarraitutasuna bermatzen da.
Gurutze Gorriarentzako zuzeneko dirulaguntza
Gobernu Kontseiluak onartu duen beste gai bat Nazioarteko Gurutze Gorriari 300.000 euroko zuzeneko dirulaguntza ematea izan da, gatazkaren eraginpean dauden eta Palestinako lurralde guztietan eragina duten herritarrei erantzun humanitarioa emateko.
Laguntzaren helburua da “premiazko premia humanitarioei erantzutea, eta berme erreala eratzeko betebeharretik salbuetsita ematen da, jarduketaren izaera eta premia kontuan hartuta, Euskadik ekintza humanitarioarekin eta biztanleria zibilaren babesarekin duen konpromisoa berretsiz”, azaldu du Ubarretxena sailburuak.
Akordio-memoranduma Fukushimarekin (Japonia)
Azkenik, Gobernu Kontseiluak Fukushimako prefekturaren (Japonia) Gobernuarekin sinatzea aurreikusten den Elkar Ulertzeko Memorandumaren berri izan du, bi alderdien arteko lankidetza ekonomikoari jarraipena emateko eta indartzeko.
Akordio horri esker, erakundeen eta enpresen arteko harremanetan sakondu ahal izango da, energiaren eremuetan: arreta berezia jarrita energia berriztagarrietan, energia-efizientzian eta energia biltegiratzeko teknologietan; bioteknologian; 4.0 industrian eta gastronomian.
Memorandum hau beste urrats bat da Euskadik Japoniarekin eta, bereziki, Fukushimako prefekturarekin dituen lotura estuetan.
