Eusko Jaurlaritzak 140 milioi euro bideratuko ditu CIC eta BERC programetara 2026-2029 aldian (Gobernu Kontseilua 2025-11-18)

• Gobernu Kontseiluak, Zientzia, Unibertsitate eta Berrikuntza Sailaren ekimenez, CIC programara 80 milioi euro eta BERC programara 60 milioi euro bideratzea onartu du
• Halaber, 4 milioi euroko partida bat onartu du 2026an ekipamendu zientifikoa erosteko
• Pérez Iglesias: "Programa hauen helburua da sistema zientifiko sendo, iraunkor eta nazioartean lehiakor bat indartzea"

Eusko Jaurlaritzak, Zientzia, Unibertsitate eta Berrikuntza Sailaren ekimenez, gaurko Gobernu Kontseiluan onartu du 140 milioi euro bideratzea Ikerkuntza Kooperatiboko Zentroen (CIC) eta Oinarrizko eta Bikaintasuneko Ikerketa Zentroen (BERC) programetara 2026-2029 aldirako, aurreko laurtekoan baino 20 milioi euro gehiago. Halaber, 4 milioi euroko partida bat onartu du 2026ko ekitaldian ekipamendu zientifikoa erosteko.

Gobernu Kontseiluaren osteko prentsaurrekoan, Zientzia, Unibertsitate eta Berrikuntzako sailburu Juan Ignacio Pérez Iglesiasek nabarmendu duenez, "programa hauen helburua da sistema zientifiko sendo, iraunkor eta nazioartean lehiakor bat indartzea, bikaintasunean eta pertsonen ongizatean oinarritua, hain zuzen".

"Programa horien bidez", azpimarratu du, "zentro horiek garatzen dituzten arloek bikaintasun-maila lortu edo mantendu egingo dituzte, eta horrek lagundu egingo du zenbait arlotan Berrikuntzaren Itsasargietan ezarritako helburuak betetzen".

80 M€ CICentzat eta 60M€ BERCentzat

CICei zuzendutako programak 80 milioi euroko finantzaketa du guztira 2026-2029 aldirako. Programa honen helburua da zentro horien egonkortasuna eta lidergoa sendotzea abangoardiako ikerketan, haien nazioarteko proiekzioa indartzea eta euskal ehun zientifiko eta teknologikoan duten eragina handitzea.

Bestalde, BERC programak 60 milioi euroko zuzkidura du laurteko bererako. Helburua zentro horien jarduera ez-ekonomikoa finantzatzea da, haien iraunkortasuna bermatzeko, jarduera zientifikoaren hazkunde iraunkorra ziurtatzeko eta nazioartekotzea sustatzeko.

Bi programek, berrikuntza gisa, finantzaketa espezifiko bat jasotzen dute Zientzia, Teknologia eta Berrikuntzako Euskal Sareko (ZTBES) gainerako erakundeei irekita dauden BERC eta CICen azpiegitura zientifiko handi bereziei laguntzeko. Azpiegitura horiek funtsezko zeregina betetzen dute, unibertsitateetako eta ikerketa-zentroetako ikertzaileen arteko lankidetza bultzatzen baitute, eta horrek nabarmen laguntzen du ezagutzaren aurrerapenean eta erronka globaletarako irtenbide berritzaileen bilaketan.

Langileen ongizate psikologikoa

Lehen aldiz, bi programetan modu espezifikoan baloratuko da zentroaren Ongizate Psikologikoko Plana, ingurune zientifikoan langileen ongizatea bultzatzeko. Zentro bakoitzeko Berdintasun Plana ere ebaluatuko da, genero-oreka handiagoa sustatu aldera.

Deialdi berriek bikaintasuna indartzera eta ikerketa-lana erraztera bideratutako hobekuntzak sartu dituzte. Halaber, kudeaketa-eredu arinagoa eta egonkorragoa ezartzen dute, zentroekiko konfiantzan, sinplifikazio administratiboan eta karga burokratikoen murrizketan oinarritua, legegintzaldi honetarako gobernu-helburuen ildotik.

Gainera, ezagutza zientifikoa gizartean zabaltzea sustatzen dute, zientzia herritarrei hurbiltzeko eta aurrerapen zientifikoak sortzen eta ulertzen parte har dezaten sustatzeko.

Eskaeren ebaluazioa Ikerbasque Fundazioak eta haren Nazioarteko Aholku Batzorde Zientifikoak (ISAC) egingo dute, eta prozesu gardena, zorrotza eta bikaintasun zientifikoko irizpideetan oinarritua bermatuko dute.

Ekipamendu zientifikoa eskuratzea

Bestalde, Eusko Jaurlaritzak, gaurko Gobernu Kontseiluan, 2026ko ekitaldian ekipamendu zientifikoa erosteko 4 milioi euroko INKER programa ere onartu du. Programa honen helburua da Zientzia, Teknologia eta Berrikuntzaren Euskal Sarea (ZTBES) osatzen duten eragileen ekipamendu zientifiko aurreratua berritzea eta hobetzea.

Deialdian datorren ekitaldian ekipamendu zientifikoa erosteko dirulaguntzak jasotzen dira, eta horien kostua (BEZik gabe) 100.000 eta 1.000.000 euro artekoa izango da.

Programa horietan sartu ahal izango dira eskabidea egiteko epea ixtean sarean akreditatuta dauden erakundeak, honako kategoria hauetakoren batean: BERC, CIC eta unibertsitateetako hainbat ikerketa-egituratan.

Inbertsio horri esker, euskal sistema zientifikoko eragileek goi-mailako azpiegiturak eta ikerketa-taldeak eskuratu edo eguneratu ahal izango dituzte, funtsezkoak baitira lehiakortasuna, bikaintasuna eta lankidetza zientifikoa bultzatzeko.