Argentinako ordezkaritza batek Euskadi bisitatu du emakumeen aurkako berdintasun eta indarkeria matxistaren arloko politikak ezagutzeko

• Bisita sektore publikoko ezagutzak trukatzeko Europako programa baten barruan sartzen da
• Ordezkaritzako arduradunek Berdinsarea edo SATEVI bezalako ekimenak ezagutu dituzte Emakundeko zuzendariaren eskutik

Miren Elgarresta Emakundeko zuzendariak eta Asier Areitio Kanpo Harremanetarako zuzendariak ongietorria egin diote gaur Cordoba eskualde argentinarreko ordezkaritza bati Lehendakaritzan.

Azterketa-bisita hau Europako TAIEX (Laguntza Teknikoa eta Informazio Trukea) estatu kideetako sektore publikoari buruzko ezagutza espezializatua helarazteko programaren barruan sartzen da. Horrela, eskualde horretako emakumeen indarkeriaren aurkako prebentzio- eta babes-arloko kudeaketa-eredua indartu nahi da, Euskadiko esperientziari erreparatuz.

Lau egunetan zehar, Kordobako ordezkaritzak hainbat bilera egingo ditu arduradunekin emakumeen eta gizonen arteko berdintasuna betearazteko Emakunderen eskumenak eta Eusko Jaurlaritzarekiko interakzioa ezagutzeko.

EAEn emakumeen aurkako indarkeria matxistaren biktimei arreta emateko erakundeen arteko III. Akordioaren berri ere emango da, eta bilerak egingo dira Eusko Jaurlaritzako berdintasun-politiken egituretako langileekin.

Argentinako ordezkaritzak instalazio batzuk bisitatzeko aukera izango du, hala nola Gasteizko ertzain-etxea, emakumeen aurkako indarkeria matxistaren biktimei polizia-babesa emateko sistema bertatik bertara ezagutzeko, eta SATEVIren zentroa (emakume biktimei informazioa eta arreta emateko zerbitzu espezializatua) Bilbon. Gizonak inplikatzeko Gizonduz ekimenaren berri ere emango zaie eta, gainera, topaketa bat egingo da Berdinsarearekin, Emakundek eta EUDELek bultzatutako emakumeen eta gizonen berdintasunaren aldeko eta indarkeria matxistaren aurkako euskal udalerrien sarearekin.