Hurtado sailburua: "Turismo jasangarriak mesede egin behar dio komunitateari eta inpaktu minimoa sortu behar du ingurunean"

• Turismoaren Kode Etiko aitzindaria nabarmendu du, NBEk bermatua eta 850 atxikimendu baino gehiago dituena, euskal konpromisoaren adibide gisa, eredu arduratsu batekin.

Turismo, Merkataritza eta Kontsumoko sailburu Javier Hurtadori elkarrizketa egin zaio gaur SER Euskadiren "La Ventana" programan. Elkarrizketa, 'Arabako Errioxa helmuga' V. jardunaldien barruan, Añanako Gatz Haranean egin da. Bertan, sektorearen gaurkotasuna aztertu da eta Euskaditik bultzatzen den turismo jasangarriaren ereduan sakondu da.

Elkarrizketan, sailburuak azpimarratu du Euskadin iraunkortasunak ez duela helburu bat izan behar, baizik eta bidea. "Turismo jasangarriaz ari garenean, komunitatean eragina duten onurak dituen turismoaz ari gara, ingurumenean eta tokiko kulturan inpaktu minimoa sortzen duena eta bidezkoa, inklusiboa eta errespetuzkoa dena", adierazi du.

Sailburuak bereziki azpimarratu nahi izan du iraunkortasunaren dimentsio soziala, zuzenean enpleguari lotuz. "Turismoa 110.000 familiaren mantenua da Euskadin, gure ekonomiaren enpleguaren % 11. Kalitatezko zerbitzuak nahi baditugu, kalitatezko enpleguak sustatu behar ditugu. Turismo etikoaren alde egiten badugu, enplegu duinak eta aukera-berdintasuna bermatu behar ditugu, eta tokiko komunitateek sentitu behar dute turismoak bizitza hobetzen duela ", baieztatu du.

Era berean, Gatz Harana balioan jarri du, antzinako baliabide gisa, ekoizpen betean, motor ekonomiko dinamiko bilakatzea lortzen duena, eta, aldi berean, haren jatorria eta ingurunea errespetatzen eta onuragarri egiten dituena. Añanako eredua turismoak finantzatutako ondare-berreskurapenean, gatz-jardueraren ingurumen-jasangarritasunean eta tokiko komunitatearen gizarte-susperraldian oinarritzen da.

Horrela, sailburuak jasangarritasunaren ikuspegi integrala helarazi du. ikuspegi horrek ingurumena errespetatzea, kalitatezko enpleguaren bidezko gizarte-errentagarritasuna eta ibilbide-orri gisa esparru etiko aitzindaria uztartzen du, eta Euskadi etorkizun turistiko arduratsu batekin konprometitutako helmuga gisa finkatzen du.