Javier Hurtado sailburuak tokiko merkataritzaren papera aldarrikatu du, gure hiriak egituratzeko eta bizitzeko zutabe gisa

Javier Hurtado Eusko Jaurlaritzako Turismo, Merkataritza eta Kontsumoko sailburuak Donostiako Merkataritzaren Sarien banaketan parte hartu du, eta bertan merkatarien etengabeko lan nekaezina aitortu nahi izan die, eta eskerrak eman dizkie beren ezinbesteko zerbitzuagatik.

Saridun guztiak zoriontzen hasi du hitzaldia sailburuak, eta nabarmendu du sari horiek tokiko merkataritzaren ezaugarri azpimarragarrienak balioesten dituztela: bere lanaren ezohikotasuna, ibilbidea eta Donostiarekin duen lotura berezia. Halaber, jasangarritasunaren aintzatespena azpimarratu du, ingurumen-irizpideekin eta tokiko produktuarekin lan egiten duten saltokiak saritzen baitira, baita ekintzailetzarena ere, sektore biziaren eta belaunaldien arteko erreleboa isla baita.

“Gure merkataritza bizirik dago eta bizia ematen die gure kaleei, baina erronka handiei ere aurre egin behar die trantsizio hirukoitzari dagokionez: digitala, ingurumenekoa eta soziodemografikoa”, adierazi du. Testuinguru horretan, 2026ko aurrekontuen aurkezpenean, Eusko Legebiltzarraren aurrean aldarrikatu du baliabide gehiago behar direla, ez soilik ekonomikoak, baita giza baliabideak ere, tokiko merkataritzari babesa eta laguntza emateko. “Zuei laguntzeko gaude hemen, eta hala egiten jarraituko dugu, Euskadiko merkataritzatik bizi zareten 135.000 familiei laguntzeko; gure lurraldeko lanpostuen % 14 zarete”, esan du.

Sailburuak esker oneko hitzak eskaini dizkie merkataritza-elkarteei ere, hala nola San Sebastian Shops ekimenari; aitortu die funtsezko lana egiten dutela administrazioen eta saltokien arteko lotura izateko. “Elkarteak merkataritza-sare horren transmisore, bozgorailu eta aholkulari zarete. Hala ez balitz, askoz ere zailagoa izango litzateke horra iristea”, nabarmendu du.

Amaitzeko, herritarrek kontsumitzaile gisa duten eginkizunaren inguruan hausnartzeko deia egin du Hurtadok. “Tokiko dendetan erosten dugunean, ez dugu egin behar gure merkataritzari laguntzeagatik bakarrik. Gure gizartean eta ongizatean inbertitzea da, eraiki nahi dugun gizartea babestea”, azpimarratu du. “Tokiko merkataritzan erostea gure kaleetako bizitzan eta segurtasunean, gure hirien antolaketan eta ingurunearen jasangarritasunean inbertitzea da. Ez dezagun ahaztu gure tokiko merkataritza gu guztion parte dela, eta gu horren parte gara”.