Gobernu Kontseiluak 1,1 milioi euroko dirulaguntza onartu du adikzioak prebenitzeko eta ohitura osasungarriak sustatzeko
Gaurko Gobernu Kontseiluak 1,1 milioi euroko dirulaguntza onartu du arriskuak eta kalteak prebenitzeko eta gutxitzeko proiektuak garatzeko eta jokabide osasungarriak sustatzeko ere.
Adikzioak prebenitzeko Euskadiko eredua komunitarioa da, komunitatean dauden baliabideak optimizatzea bilatzen duena, esku-hartzearen azken hartzaileengana iritsi ahal izateko. Ildo horretan, nabarmentzekoa da irabazi-asmorik gabeko gizarte-ekimeneko erakundeen jarduera, laguntza-lerroa haientzat baita, eta 1.118.500 euroko zuzkidura du. Horietatik 236.000 euro erabiliko dira ausazko jokoarekiko adikzioa eta substantziarik gabeko beste adikzio batzuk prebenitzea eta tratatzea helburu duten proiektuak diruz laguntzeko.
665.000 euro doktore eta doktoratu aurreko ikertzaileen mugikortasunerako
Eusko Jaurlaritzak oniritzia eman die ikertzaileen, doktore zein doktoratu aurrekoen, mugikortasuna eta prestakuntza sustatzeko bi deialdiri. Guztira 665.000 euro izango dira, eta helburu hauek ditu: , I+G+Bko euskal sistemaren gaitasun zientifikoak eta teknologikoak indartu nahi dira, ikerketaren nazioartekotzea erraztu eta ikerketa-karreraren etapa guztietan bikaintasuna sendotu.
Lehenengo deialdia, Egonlabur izenekoa, Ikertzaileak Prestatzeko Doktoratu Aurreko Programa aplikatzen den zentroez bestekoetan egonaldiak egiteko laguntzena da. Deialdi honek 465.000 euro bideratzen ditu trebatzen ari diren ikertzaileen nazioarteko prestakuntza indartzera. Ikermugikortasuna izeneko bigarren deialdia Ikertzaile Doktoreen Mugikortasun Programari dagokio. Honek 200.000 euroko aurrekontua du eta bi eta sei hilabete arteko egonaldiak sustatzea du helburu, estatuko eta nazioarteko unibertsitateetan eta ikerketa-zentroetan.
Euskal kultura-ondare immateriala babestea
Gobernu Kontseiluak onartutako beste puntu bat 2025-2026 aldian euskal kultura-ondare immateriala babesteko proiektuak diruz laguntzeko deialdia izan da. Guztira 400.000 euro bideratuko dira, aurreko ekitaldiko deialdira bideratutako zenbatekoa bikoiztuz.
Jarduerak honako hiru dirulaguntza-lerro hauetan izango dira: ikerketa, katalogazioa, analisia eta planak; ondare immateriala sortzeko eta zabaltzeko jarduerak egitea dakarten proiektuak, eta, azkenik, toki-erakundeek ondare immateriala sustatzeko eta zabaltzeko egindako jarduerak.
Mutur Beltz proiektu kulturala eta agroekologikoa babestea
Era berean, Gobernu Kontseiluak oniritzia eman dio Mutur Beltz Elkarte Agroekolo Artistiko eta Kulturala sustatzeko 48.000 euroko zuzeneko dirulaguntzarekin. Proiektu kultural eta agroekologikoa da, tokian-tokian praktika artistiko, afektibo eta politikoen konstelazio bat ehunduz. Ardi karrantzar aurpegi beltza abiapuntutzat hartuta — galtzeko arriskuan dagoen arraza autoktonoa —, Mutur Beltzek artilea materia artistiko eta sinboliko gisa onartzen duen, landa-pentsamendu garaikidea aktibatzen duen eta eredu iraunkor eta sortzaileak proposatzen dituen ekosistema kulturala sortu du.
Ertzainak euskalduntzen jarraitzeko akordioaren berritzea
Gobernu Kontseiluak baimena eman du HABErekin, Helduen Alfabetatze eta Berreuskalduntzerako Erakundearekin, sinatutako akordioa berriz argitaratzeko, Ertzaintzako agenteak beren lan-ordutegitik kanpo prestatzeko, bai aurrez aurre, bai autoikaskuntzako modalitatean, 2025-2026 ikasturtean.
Segurtasun Sailaren eta Euskadiko udalen arteko polizia-lankidetzarako hitzarmena
Segurtasun Sailarekin lotutako beste puntu bat Euskadiko udalekin sinatutako Polizia Lankidetzarako Lankidetza Hitzarmena onartzea izan da.
Hitzarmen-eredu honek Ertzaintzaren eta kidego edo zerbitzu hori duten udaletako udaltzaingoen arteko lankidetza eta elkarlanerako moduak eta prozedurak arautzen ditu, Euskadin eskuragarri dauden polizia-baliabideak optimizatzeko eta herritarren segurtasun publikoko beharrei zerbitzu hobea emateko.
Gipuzkoako Astigarraga udalerrian aldiriko trenbide-zerbitzuetarako geltokia eraikitzea
Azkenik, Gobernu Kontseiluak argi berdea eman dio Euskal Trenbide Sareari (ETS) Astigarragan aldiriko trenbide-zerbitzuetarako estazioa eraikitzeko agintzen dion kudeaketa-gomendioari.
Proiektuak barne hartzen du nasen eta trenbideen gainean kokatutako eraikin bat, 420 m2-ko atondoa duena, alboko bi nasekin lotuko dena, 160 metroko luzerakoak, eskailera eta igogailuen bidez. Geltoki berrira sartzeko, Donostia eta Astigarraga lotuko dituen 306 metroko oinezkoentzako eta bizikletentzako pasabide bat egingo da, gaur egun trenbide-sareak eta Urumea ibaiak bereizita. Geltokiaren eta pasabidearen guztizko inbertsioa 15 milioi eurotik gorakoa izango da. Geltokia Estatuko trenbide-administratzaileak ordainduko du oso-osorik, eta Eusko Jaurlaritzak 2,6 milioi euro jarriko ditu sarrerako pasabiderako – Adifek 1,2 milioi gehituko dizkie sarbideei –.
