Osakidetzak gripearen aurkako txertoa hartzera animatzen du, kutsatzeen kurba aurreratu daitekeelakoan

• Azken astean detektatutako kasuen gorakadak, bereziki Bizkaian, kurba epidemiologikoa aurreratu daitekeela iradokitzen du
• Kanpainaren lehen bi asteetan, 202.000 pertsonak baino gehiagok jaso dute jada gripearen aurkako txertoa; haurren artean, immunizazioa erritmo onean doa, sei hilabete eta 5 urte arteko 7.100 haur baino gehiago txertatuta
• Osasun Sailak eta Osakidetzak hitzordua lehenbailehen hartzeko deia egiten dio xede-populazioari (60 urtetik gorakoei, haurrei, haurdun daudenei eta arrisku-taldekoei). Gainerakoentzat, txertaketa azaroan hasiko da

Urriaren 6an Osakidetzak gripearen aurkako txertaketa-kanpaina abian jarri zuenetik, guztira 202.015 pertsona immunizatu dira, eta 80.000 gehiago deitu dituzte datozen egunetan txertoa hartzeko. Osakidetzak gogorarazten du garrantzitsua dela arnas gaixotasun horietatik babestea, batez ere pertsona zaurgarria bazara, kutsatuz gero konplikazio larrienak izan baititzakezu. Ildo horretan, ohartarazi du kutsatzeen kurba aurten aurreratu daitekeela, azken astean, bereziki Bizkaian, atzemandako kasuen gorakadaren aurrean, aurreko bi kanpainetan, garai berean, baino handiagoa baita.

Eusko Jaurlaritzako Osasun Sailak eta Osakidetzak gogorarazten dute osasunaren konplikazioak ekiditeko modurik eraginkorrena txertoa dela, eta txertoa ahalik eta lasterren hartzera gonbidatzen zaituztegu; izan ere, datorren asteetan gripearen intzidentziak pixkanaka-pixkanaka gora egitea espero da.

Izan ere, egoera epidemiologikoaren konparazio-analisiaren arabera, litekeena da kutsatzeen kurba aurreratzea; izan ere, azken astean kasuen gorakada handia izan da, bereziki Bizkaian. Ospitaleetan, kanpainaren bigarren astean, atzemandako gripe-kasuen kopurua nabarmen igo da (506) aurreko kanpainekin alderatuta (166 2024an eta 105 2023an). Kanpainaren lehen hiru asteetan metatutako kasuen kopurua kontuan hartzen badugu (1.120 kasu), egoitzetako lehena barne, aurreko bi kanpainetan baino nabarmen handiagoa da (410 kasu 2024an, eta 331 kasu 2023an lehen hiru asteetan), eta horrek kasuen kurba epidemiologikoa aurreratu daitekeela iradokitzen du.

 Era berean, ospitaleratzeen kopurua data horietan 2024an erregistratutakoak baino handiagoa da. Zehazki, kanpaina honetan 131 ospitaleratze izan dira gripearen ondorioz, eta kopuru hori azaroaren erdialdera iritsi zen lehengo urtean.

Nola hartu hitzordua

 Ildo horretan, Osakidetzak zita hartzea gomendatzen du; bai telefono bidez (erreferentziazko osasun-zentrora deituta), bai Osakidetzaren webgunearen bidez har daiteke. Hilabete honetan, urrian, lehentasuna emango zaio xede-populazioaren gripearen aurkako txertaketari. Xede-populazio hori honako hauek osatzen dute:

• 60 urte edo gehiagokoak.
• 6 hilabete eta 5 urte bitarteko haurrak (59 hilabete artekoak arte).
• Immunoezabatzea edota patologia kronikoren bat (biriketakoa, bihotzekoa, diabetesa...) duten pertsonak.
• Haurdun dauden emakumeak.

Xede-populazioaren txertaketa amaitu ondoren, azaroaren hasieran, gainerako biztanleen zitazioa abiaraziko da.

Haurren artean ere txertaketak erritmo onean egin du aurrera, eta guztira 7.145 dosi eman zaizkie sei hilabete eta bost urte bitarteko adingabeei. Osakidetzak berriz ere jarri du arreta haurrengan, ez soilik euren osasunean sor daitezkeen konplikazioak direla-eta, baizik eta transmisio-gaitasuna handiko taldea delako ere.

Gainera, instituzionalizatuta dauden pertsonei ere, hots, egoitzetan bizi direnei ere, jartzen ari gara txertoa. Gehien bat, adineko pertsonak dira horiek. Astebete lehenago hasi zen talde horren txertaketa, zehazki, iraileko azken astean, eta jada gripearen aurkako % 62,5eko estaldura eta COVIDaren aurkako % 52,3ko estaldura daukate. Gogoratu behar da kanpaina honetan 75 urtetik gorako pertsonei txerto berezi bat ematen zaiela, eraginkortasun indartukoa, bai eta COVIDaren aurkako txertoa ere, halakorik jaso nahi badute. Adin-tarte horretako pertsonen % 75ek bi txertoak jaso dituzte aldi berean. 130.139 pertsonak COVIDaren aurkako txertoa jaso dute (75 urtetik gorakoentzat edo arrisku-taldeentzat dago indikatuta txerto hori).