Euskadiko giza baliabideak eta baliabide materialak Gaztela eta Leongo suak itzaltzen laguntzen hasi dira suteen aurkako helikopteroarekin batera

Gaztela eta Leongo iparraldean aktibo dauden suteak itzaltzen laguntzeko Euskadik bidali dituen giza baliabideak eta baliabide materialak suteen tokira iristen ari dira eta egin beharreko lana bertatik bertara ezagutzen ari dira.

Euskal erakundeak, foru aldundiak eta Eusko Jaurlaritza, elkarlanean ari dira abuztuaren 15etik suteen aurkako helikopteroarekin, Europako Mendietan eta Palentziako mendietan piztutako suak itzaltzeko. Atzo, Gaztela eta Leongo Gobernuak Euskadik suteak itzaltzeko emandako laguntza eskertu zuen, eta baliabide gehiago eskatu zituen.

Euskal erakundeek berehala erantzun dute, eta dagoeneko giza baliabideak eta baliabide materialak bidali dituzte sua itzaltzeko lanetan laguntzeko. Gaur, Arabako, Bizkaiko eta Gipuzkoako foru-aldundietako eta Bilboko Udaleko suhiltzaileak eta Bizkaiko Foru Aldundiko Mendi eta Basalan Zerbitzuko langileak abiatu dira. Baliabide horiei helikopteroko bi tripulatzaileak ere gehitu behar zaizkie. Guztira 71 pertsona egongo dira bertan lanean Eusko Jaurlaritzako larrialdietako teknikari batek koordinatuta. Teknikari hori etengabeko harremanetan dago tokiko agintariekin.

Mobilizatutako baliabide materialen artean daude baso-ponpa astunak, karga-furgoiak, zisterna-ibilgailuak, lur orotako ibilgailuak, pickup-ak eta langileen garraioa, eta baso-helikopteroa. Laguntza-robotak ere badaude, besteak beste, sasiak garbitzeko robot bat, eskuzko erremintak, motozerrak, tantakako zuziak eta behaketa-dron bat, koordinazioa indartzeko. Baliabide guzti hauek modu mailakatuan iristen ari dira suteen-eremura. Iritsi ahala, lantaldeen artean lan-sektoreak banatzen ari dira, perimetroak finkatzeko eta puntu beroak kontrolatzeko. Eguraldiak hobera egin du azken orduetan, eta tenperaturak behera egin du, suteak hedatzeko arriskua murriztuz.