Arabako Mendialdeko asfalto naturaletako meatze-paisaien ibilbideak eskualdeko iragan industriala azaleratzen du

• Foru Aldundiak oinezkoentzako eta bizikletentzako egokitu duen 39 kilometroko bideak meatze-paisaien, haien testuinguru geologikoaren eta naturalaren ikuspegi zabala eta erakargarria eskaintzen du.

Arabako Mendialdeko asfalto naturaletako meatze-paisaien interpretazio-ibilbidea errealitate bihurtu da dagoeneko, Foru Aldundiak egindako egokitze-lanak amaitu ondoren. Gaur goizean, Javier Hurtado Eusko Jaurlaritzako Turismo, Merkataritza eta Kontsumoko sailburuak, Ramiro González Arabako ahaldun nagusiak eta Saray Zárate eta Cristina González foru diputatuek, tokiko agintariekin batera, oinezkoentzako zein bizikletentzako diseinatutako bide ikusgarri honen zati batzuk zeharkatu dituzte.

39 kilometroko ibilbideak natura-ondare paregabearen, haren testuinguru geologikoaren eta eremuaren iragan industrialaren ikuspegi zabala eta erakargarria eskaintzen du. Pasealekuak Antoñanako Vasco-Navarro trenbidearen interpretazio-zentroa, Korreseko Izki Parke Naturalekoa eta Atauriko trenbide zaharraren geltoki zaharra lotzen ditu. Geltoki horretan egongo da etorkizunean asfalto naturalen interpretazio-zentroa.

Esku-hartzearen ondorioz, San Ildefonso herria eta A-4124 errepidea lotzen dituen bidea berreskuratu da, Vasco-navarro trenbidearen Interpretazio Zentroaren eta Bujanda bidearekin bat egiten duen gunearen arteko zatia egokitu eta sendotu da, eta San Ildefonso herriaren eta Izkiko Parke Naturalaren (Korres) arteko lotunearen azken zatia egokitu da.

Jarduketa horiei esker, 14,9 kilometroko ibilbide zirkularra bizikletaz egin ahal izango da. Ibilbide hori oso erosoa da familiarekin egiteko, eta hiru interpretazio-zentroak lotzen ditu, “Asfaltoen triangelua” izenekoa. Horrela, bisitariek eskualdeko funtsezko hiru balioren ikuspegi globala izango dute: asfalto naturalen ustiapen historikoa, Izkiko Parke Naturala eta Vasco-Navarro Bide Berdea.

Javier Hurtado sailburuak nabarmendu duenez, “Helmugako Jasangarritasun Turistikoko Planek Europako Funtsetatik 80 milioi baino gehiago txertatu dituzte Euskadin, eskualde eta udalerrietako hainbat motatako 34 proiektutarako. Horren adibide da Arabako Mendialdeko Eskualderako Plan hau, 2,1 milioi eurokoa, eta dagoeneko ikus, sentitu eta goza ditzakegun jarduketak barne hartzen ditu. Funts horiei eta erakundeen lankidetzari esker, Arabako Mendialderako turismo industrialeko produktu bat izango dugu, Arabako ondare eta turismo erakargarriak eta haren memoria eta ondare industriala bultzatzeko”.

“Triangelu” horretan barna, Mendialdeko iragan industrialeko beste zenbait harribitxi ere ezagut daitezke: XIX. mendeko San Ildefonsoko meatzaritza-herrixka (urte hauetan zehar indusketa arkeologikoak egin dira), eta lurpean sartu eta Luzia meategia esploratzeko aukera, bisitak jasotzeko Foru Aldundiak egokitu duen meatze-ustiategia.

• Bilboko HJTPren eta Gipuzkoako Bizikleta Bideen HJTPren aurkezpena

Gaur bi HJTP berri aurkeztu dira, tartean Bilboko Udalarena. Daniel Solana Basquetourreko zuzendaria eta Nora Abete alkateordea bertan izan dira. Planak 4,8 milioi euro ditu guztira, eta Bilbo hiri-helmuga berritzaile gisa sendotzea du helburu, ingurumen-, gizarte-, ekonomia- eta lurralde-jasangarritasuna integratuta, eta klima-aldaketari eta gehiegizko eskari turistikoari bezalako erronkei aurre eginda. Artxanda aisialdirako, kirolerako eta gastronomiarako gune natural izan dadin biziberritzea dute helburu ekintzek, Artxandako Aktibazio Planaren bidez, ingurunea ikuspegi jasangarritik modernizatuta, hiriaren lehiakortasun turistikoa indartzeko.

Bestalde, Clara Navas Eusko Jaurlaritzako Turismo eta Ostalaritzako zuzendaria Narrondo (Zumaia) eta Iraeta (Zestoa) arteko bidegorri zati berriaren ekitaldian izan da. Bide berriak 4,15 km ditu eta 2,8 milioi euroko inbertsioa, eta Gipuzkoako Bizikleta Bideen Lurralde Plan Sektorialaren eta Helmugako Jasangarritasun Turistikoko Planaren parte da. Jasangarritasun Sailak bultzatutako azpiegitura horrek Zumaia eta Zumarraga arteko 47 km-ko bizikletentzako korridore bat osatzen lagunduko du 2026-2027 aldirako, mugikortasun justuagoa, osasuntsuagoa eta jasangarriagoa sustatuta. Proiektuaren helburua da Gipuzkoa egituratzea sare konektatu eta irisgarriaren bidez, ibilbide historikoak biziberrituta eta ohitura arduratsuak sustatuta, bizi-kalitatean eta lurralde-kohesioan zuzeneko eragina izango dutenak.