Imanol Pradales Lehendakariak eta Aitor Estebanek Euskadiren erronka nagusiei heldu diete

• Topaketak ordubete iraun du, eta Ajuria Enean egin da, elkar ulertzeko giroan

Imanol Pradales Lehendakariak eta Aitor Esteban Euzkadi Buru Batzarreko presidenteak lehen lan-bilera ofiziala egin dute gaur, joan den igandean Estebanek EAJren buruzagitza hartu zuenetik.

Ajuria Enean, ordubeteko topaketan, erabateko elkar ulertze giroan, Lehendakariak eta Estebanek, Euskadik dituen erronka nagusiei buruzko diagnostikoa partekatu dute, eta erronka horiei modu estuan heltzeko konpromisoa hartu dute. Aurretik ere biek elkarrekin lan egiteko aukera izan dute.

Gizarte-ongizatea, industria-lehiakortasuna, autogobernuan aurrera egitea, erronka demografikoa edo klima-aldaketa izan dira lehen hurbilketa batean landu diren gaietako batzuk, nahiz eta biek adostu duten horietan sakontzea.