Ekimenarekin konpondu nahi diren arazoak
1.- Euskadiko Kooperatiben Erregistroa erregistro-prozeduren izapidetze telematikora egokitzeko beharra, eta, aldi berean, indarrean dagoen prozedura berrikustea, hain konplexua izan ez dadin eta eraginkorragoa izan dadin, erregistro-espedienteen administrazio-kudeaketa eraginkorragoa izate aldera.
2.- Erregistro-prozedurak arintzea, batez ere sozietate-bizitzaren une kritikoetan, hala nola eraketan, kooperatiba-enpresa berriak sortzen laguntzeko beste neurri bat bezala.
3.- Oro har, epeak laburtzea eta izapideak sinplifikatzea edo, hala badagokio, ezabatzea erregistro-prozeduretan.
4.- Bermatzea interesduna gustura dagoela Euskadiko Kooperatiben Erregistroarekiko harremanetan zerbitzu publiko digitalak erabiltzen dituenean, eta, horretarako, erraz erabiltzeko eta eskuratzeko moduko zerbitzu digitalak eskura jartzea.
Araudia onartzeko beharra eta egokitasuna
Beharrizana: Azaldu den guztiaz gain, erregistro-erregulazio berri bat da beharrezkoa erregistro-prozedurak martxoaren 29ko 59/2005 Dekretuaren indarraldian sortutako beharretara egokitzeko, hots, izapideak kendu eta argitzeko, eta, nolanahi ere, erregistro-zerbitzuaren segurtasun juridikoa –erregistro-zerbitzuaren helburua– bermatzeko.
Aukera: 59/2005 Dekretua argitaratu zenetik igarotako denbora, behin eta berriz aipatua, interesdunek bitarteko telematikoak erabiltzea hartzen ari den garrantziari eta protagonismoari gehituta, aipatutako administrazio-prozeduraren arauetan ezarritako egungo eskariari gehitzen zaio, hau da, prozeduren izapidetze elektronikoa izan behar da administrazio publikoen ohiko jarduera, eta, beraz, premiazkoa da helburu horiek betetzen eta errazten dituen erregistro-arau bat egitea.
Arauaren helburuak
Proiektatzen den dekretuaren xedea da Euskadiko Kooperatibei buruzko abenduaren 20ko 11/2019 Legearen azken xedapenetako laugarrena betetzea, Jaurlaritzak Euskadiko Kooperatiben Erregistroaren antolaketa- eta funtzionamendu-erregelamendu berri bat onartzeari dagokionez, erregistro-espedienteen izapidetze elektronikoa arautzeko eta erregistro-eragiketa sinplifikatzeko.
Izan litezkeen bestelako aukera erregulatzaile eta ez-erregulatzaileak
Ez dago alternatiba ez-arauzkorik, teknikorik edo instrumentalik, Euskadiko Kooperatibei buruzko abenduaren 20ko 11/2019 Legearen azken xedapenetako laugarrenean ezarritako legezko baldintzak direla eta.
