El Lehendakari ha participado en el homenaje del Ayuntamiento de Azkoitia a Julene Urzelai, por su contribución a la sociedad

(lehendakariaren hitzaldia laster hasiko da) Javier alkate jauna, zurekin batera zareten zinegotzi, sailburua, foru diputatua, zaudeten herri agintari, herri ordezkariok, gizataldeetako eta erakundeetako ordezkariok, Mikel eta Julene Urzelairen senitartekok, jaun andreok, egun on. Eskerrik asko zuen gonbidapenagatik. Benetako ohorea da ekitaldi honetan zuekin guztiokin parte hartzeko aukera izatea. Ez nuen Julene Urzelai ezagutzeko aukerarik izan. Baina haren ingurukoek bere izena zelako harrotasunarekin daramaten ikusteak aparteko emakume bati buruz hitz egiten gaudela erakusten digu. Zenbaitetan, pertsona bat nolakoa den jakiteko ez da beharrezkoa aurrez aurre ezagutzea. Hori baino garrantzitsuagoa da utzi duen legatuaren berri izatea. Julene izena aipatzen dugunean, aurpegian irudikatzen zaizuen irribarreak erakusten digu gure herriari egin dion ekarpena izugarria izan dela. Apartekoa izan dela. Hamaika istorio entzun ditut. Baina badira istorio horietako bakoitzean behin eta berriz errepikatzen diren hitzak: duintasuna, dotorezia, konpromisoa, itxaropena eta gorrotorik eza. Ez zaizkit transmititu beharreko balore hoberik bururatzen. Ezaguna da gure aberriaren historian emakumeek izandako funtsezko ekarpena. Gaur gara, beraiek izan zirelako. Eta izango dira gure inguruko emakumeak ere badirelako. Julene, eta Emakume Abertzale Batzako emakumeak, gure historia dira. Gure parte dira. Gure herriaren oinarri eta zutabe sendoak dira. Aberrigintzan ekarpen itzela egin zuten eta, egia da, ezingo diegu inoiz ere bere lana behar bezala eskertu. Baina etorkizunean neskatxa gazte bat estatua honen parean jartzen denean, berehala jakin beharko du duintasuna bandera modura eraman zuen abertzale eta demokrata baten aurrean dagoela. Gure lana baita Julene Urzelaik erakutsi zizkigun balioak gure ondorengoei transmititzea. Historian irabazi duen tokia zaintzea. Gure erantzukizuna da orain bere legatua babestea eta zabaltzen laguntzea. Julenek eta bere belaunaldiko emakume gehiegik ez zuten bizitza erraza izan. Gerra bidegabe eta krudel batek beraien ametsak errotik zapuztu zituen eta erbesterako bidea hartu behar izan zuten. Baina beraien sentimenduetan ez zegoen gorrotorako lekurik. Horrek, benetako indarra erakusten du. Abertzale sutsua zen eta hori zabaldu zuen bere bizitza osoan lau haizetara. Baita euskal zaletasuna ere. Ez ditzagun inoiz bere balioak ahaztu. Erabili ditzagun bizitzak ematen dizkigun aukera guztiak erakutsi zigutena transmititzeko. Asko zor diegu bera bezalako emakumeei. Gure aitortza Julene eta bere belaunaldiko emakume guztiei. Ziur naiz enbor horretatik beste emakume erreferente asko sortuko direla. Eskerrik asko.k asko.