El Lehendakari subraya en la reunión del Consejo Asesor del Euskera que es necesario el esfuerzo y la solidaridad de todos y todas para un futuro saludable y sostenible del euskera

(ez da entzuten) Herri agintari eta ordezkariok, Euskararen Aholku Batzordearen kideok, jaun andreok, arratsalde on. Ongi etorriak Lehendakaritzara eta eskerrik asko zuen parte hartzeagatik eta zuen ekarpenengatik ere. Gaur, zuen baimenarekin, 1999 eta 2002 urteen artean Aholku Batzorde honen kidea izan zen Ramuntxo Camblong oroituz hasiko gara. Euskaltzale eta pertsona ona. Goian bego. Bizi dugun pandemia garai honetan, ideia bat partekatuz hasiko naiz. Hala esaten genuen: "Egokitu zaion garaiari egokitzea da aurrera begira bizi nahi duen gizarte baten lehen eginkizuna". Garaiari egokitzearekin batera, ezinbestekoa du etorkizunari begira hobetu beharrekoak lantzea ere. Egokitu, etorkizunari begira, hobetu, landu, etengabe berritu. Horrela, Garapen jasangarriaren helburuei begira jarri gara mundua osatzen dugun gizarte guztiak eta, ongi asko dakigu euskarak behar duela, eta baduela, ikuspegi horretan berezko toki bat, ezinbestekoa bezain ukaezina. Euskararen etorkizun osasuntsu eta jasangarriak nahitaez ahalegin planifikatura behartzen gaitu. Herritarren eta multzoen arteko elkartasunezko loturak zaindu eta indartuko dituen plangintza. Pertsonaren neurrian diseinaturiko plangintza, askotariko pertsonen eta taldeen inplikazioa bilatuko duena. Gaurko osoko bilkura honetan, hain zuzen ere, plangintza horren goreneko emaitza izango dugu hizpide: Euskararen Agenda Estrategikoa 2021-2024. Une berezian datoz Agenda eta Bilkura ere. Gure gizarteak, mundu osoan bezala, galdera asko egin behar izan dizkio bere buruari hilabete ilun hauetan. Erantzukizun pertsonal eta kolektiboaz galdetu behar izan diogu geure buruari maiz, elkartasunaz, zuhurtziaz, neurrien egokitasunaz, baita haien eraginkortasunaz ere. Gogoeta horrek errekuperazio pertsonal eta sozialerako ikuspegi hobe batean jarri behar gintuen eta aztertu behar dugu, orain, benetan jarri ote gaituen ikuspegi hobe horretan. Baiezkoan egon nahi dut. Ikuspegi hobe batetik abiatu garela uste dut. Gure ahuldade eta indarren neurrian jakitun gara, edo neurriaren jakitun gara, inoiz baino jakitunago. Era berean, elkarrenganako enpatia eta errespetuz jardueraren... jardutearen balioaren jakitun gara, Inoiz baino jakitunago. Badakigu horretan jokatzen dugula gure ahalegin guztien eraginkortasuna. Eta euskararen normalizazioaz ere ari naiz, noski. Izan ere, bada zerbait Euskararen Nazioarteko Egunera hurbiltzen ari garen honetan ozenago esan beharrekoa, eta honako hau da. Hain zuzen ere: gure gizarteak argi utzi du, Euskaraldia bezalako ekimen arrakastatsuetan, beste hainbat ekinbidetan ere, ez duela zordun izan nahi euskararen bizi indarrari dagokionez. Alderantziz, irabazi garbiko balantzea nahi du gure gizarteak euskararen erabileran eta beraz, bizi-indar eta osasunean. Horixe da besteak beste, Garapen jasangarrirako gizarteak egin nahi duen ekarpen nagusietako bat: Iraganeko eta gaurko hizkuntza gurea etorkizuneko hizkuntza ere izan dadila. Alor guztietan lan egin beharko dugu horretarako. Oso bereziki komunikazio eta berrikuntzaren gizarteak etengabe sortzen eta berrasmatzen dituen gune eta espazioetan. Aurrera egin behar dugu, erabilera formaletan egiten ari garen irmotasunez, euskararen erabilera ez formaletan ere. Hau da, eremu askeetan, atsegin eta gozamen pertsonal eta kolektiboaren espazioetan. Euskararen bizi-indarraren hazkunde esponentziala izango dugu sari horrela jokatzen badugu. Amaitzeko, gogoeta bat egin nahi dut gazteriaren inguruan, haientzat zaila, oso zaila, gertatu den eta oraindik gertatzen ari den egoera honetan. Dena eskatzen diegu gazteei, euskararen normalizazioari dagokionez ere. Haiengan jartzen ditugu itxaropenak, eta haiek gogoan ditugula bideratzen ditugu hainbat eta hainbat ekimen. Hala behar du, ezbairik gabe, haiek baitira etorkizunaren berme bakarra. Baina erantsi diezaiogun ezaugarri bat gure ahaleginari, gazteen inplikazioa lantzearren: gizarte bizitzaren alor guztietan bezala, gure gazteek badakite eskuzabaltasunez jokatzen euskararen erabilerari dagokionez ere. Aitorpen hori merezi dute, diskurtsoan zein praktika. Neurri handi batean, haiei esker goaz aurrera. Merezi dute gizarte osoaren onespena, euskararentzat bizi emaile baitira. Jaso dezatela beraz, Euskararen Aholku Batzordearen onespena. Hori da, gaurko gure lehen proposamena. Mila esker guztioiztioi