Amaia Agirre Pinedori eskaria luzatzen diot behingoz Berrikuntza arloan helburuak argi zehazteko eta BeAtarren figura zentzu praktikoz betetzea

Kaixo Inma,
Ezer baino lehen, eskerrak eman nahi dizkizugu zure ikuspuntua helarazi eta ekarpenak partekatzeagatik. Dakizun eran, hezkuntza sistema orohar eraldaketarako prozesu sakon baten barruan dago, pandemiak areagotu zuena. Hainbat erronka ditu etengabean aldatzen ari den gizartearen errealitate konplexu eta anitzari erantzun ahal izateko. Baina helburua beti da ikasleei ahalik eta baliabide eta irakaskuntza-ikaskuntzarik onena eskaintzea, bera baita ardatza.

Aldaketa horien artean, curriculum berrira egokitzea, digitalizazioa erabat eta behingoagatik ikaskuntza prozesuetan modu eraginkorrean txertatzea gelako praktiketan eta curriculum sozioemozionala, zaintza eta ongizatea erdigunera ekarrita.

Zuk adierazi bezala, ematen ari garen urrats berriak etengabean baloratzen eta ebaluatzen ari da Hezkuntza Saila, berrikuntza aholkulariek ikastetxeei eta irakasleei entzunda. Jasotako iritziak aintzat hartzen ari gara, eta moldaketak egiteko prest dago Saila. Izan ere, berrikuntza-bide eta urrats urratzaile guztietan, bide bakarrik eta lerro zuzenik ez dago; malgutasunez jokatu behar dugu denok, hezkuntza sistemaren eragile guztien inplikazioarekin lortuko baitira eskuartean ditugun helburuak.

Irakasleen digitalizazio gaitasunen inguruko prestakuntza dela eta, honetan trebatuak bereziki izan diren aholkularien gidaritzapean eta jakintzapean diseinatu da akreditazio-ibilbidea. Sinistuta gaude haien lana bikaina izan dela, eta hezkuntza-sistemako irakasle guztientzat aberasgarria izango dela, Irakasleen Gaitasun Digitalaren Markoaren ezagutza modu koherentean eta praktikoan bideratu baita.

Hala eta guztiz ere, prestakuntzaren muina Curriculum berria da, eta bide batez, Curriculumari dagozkion atazek bai curriculumari bai gaitasun digitalei erantzungo die.
Bestalde, BEAtarrak prestatuak izango dira garaiz, klaustrokideak ikastaroan hasten direnerako. Ikastetxean prestakuntzaz arduratuko den BEAtarra esleitutako mentorearekin bilduko da aldez aurretik, zalantzak argitzeko.

BEAtarren prestakuntza indartuko da saio presentzialak lehenetsiz. Hortaz, zurekin bat gatoz, BEAtarrak trebatuak izan behar direla. Bestalde, ikastaroak irekitzeko epe jakina izango da baina ez du itxiera-datarik; izan ere, ikastetxe bakoitzak baloratuko baitu zein erritmotan bideratu prestakuntza. Gainera, klaustroaren erritmo orokorraz gain, irakasle guztiek irekita edukiko dute prestakuntza nahi eran atazak bukatu ahal izateko.

Ikastaroa autoikaskuntzarako diseinatuta badago ere, gomendagarria deritzogu ikastetxeetan elkarlanerako eta hausnarketa partekatuak egiteko momentuak antolatzea, ikasitakoak benetan eguneroko praktikan isla izan dezan lortzeko. BEAtarrek gogoeta dinamizatzeko ereduak jasoko dituzte, saio berezituetan.
Horiekin guztiekin batera, gogoratu beharrekoa da ikastaroan ibilbide ezberdinak eskainiko direla, irakasle bakoitzak orain arte egindako digitalizazio ibilbidean oinarrituta ondoen egokitzen zaiona hauta dezan.

Azkenik, eskertzen dizugu ikastetxeetara hurbiltzeko egin diguzun gonbitea; ikastetxeengandik, zuzendariengandik eta irakasleengandik gertu egoten saiatzen gara, horretarako, aholkulariak sakabanatuta ditugu Berritzegune Nagusian eta tokiko berritzeguneen bidez. Nahi duzunean elkar gaitezke eta aurrez aurre hitz egin, zure iradokizunak ongi-etorriak izango baitira. Denok gara hezkuntza sistema.
Eskerrik asko.

Amaia Agirre Pinedo,
Ikaskuntzaren eta Hezkuntza Berrikuntzaren zuzendaria