Ez dago erreklamazio txikiegirik, ezta enpresa handiegirik ere, Javier Hurtado sailburuari elkarrizketa Cadena SER irrati-katean

Turismo, Merkataritza eta Kontsumo sailburuak, SER katean egindako elkarrizketa batean, Kontsumitzaileen eta Erabiltzaileen Estatutuaren Legea Eusko Legebiltzarrean onartzearen garrantzia azaldu du gaur.

Sailburuaren ustez, lege hori oso beharrezkoa da, kontsumo-ohiturak erabat aldatu direlako. Horregatik, lege moderno bat onartu dugu, aurrerakoia, izaera sozial nabarmenekoa, pertsona ahulenei arreta berezia eskainiz.

Legearen berrikuntza nagusiei buruz galdetuta, sailburuak nabarmendu du, alde batetik, informazio-eskubidea indartzen duela, baita bitartekaritza, ikuskaritza eta zehapena ere. Zehapenari dagokionez, ekimen aitzindari bat nabarmendu behar dut: bidegabe kobratutako zenbatekoak itzultzea. Kopuru horiek bezeroari itzuli ahal izango dizkiogu zehapenean bertan, auzibidera jo beharrik gabe.

Legeak, halaber, pertsona kalteberen babesa azpimarratzen du, aldez aurretik hitzordurik gabe etxez etxeko salmenta debekatzea bezalako ekimenekin, eta horrek bereziki adinekoei eragiten die.

Sailburuak erreklamatzeko orduan beldurrik ez izateko gomendatu die pertsona guztiei. Beti esaten dut ez dagoela erreklamazio txikirik, ezta enpresa handiegirik ere. Horretarako, herritarren eskura jartzen dugu aurrez aurreko arreta, telefono bidezko arreta edo posta elektroniko bidezkoa.

Legearen beste berrikuntzetako bat da kontsumo-ikuskatzaileek ez dutela beren burua identifikatu beharko ikuskapen bat egiteko orduan, horrek ikuskapena zapuztuko balu. Horrela, hobeto jardun ahal izango da abusuzko praktiken aurka. Gainera, enpresek azken 3 urteetan egindako zehapenen publizitatea egin ahal izango da, baita erreklamazio eta abusuzko klausulena ere.